Waan reemayoo
Rarankii jacayl
Waa i riiqayoo
Waan rafaadsane
Iga raali noqo
Kaama reebi karo
Ruuxdii shalay
Ku rejeysatee
Iga raali noqo
Riix udgoon le iyo
Hawo raaxo loo
I ruxdaad tehee
Iga raali noqo
Kaama riixi karo
Run ahaan qalbiga
Rakadaad kortee
Iga raali noqo
Rubucaad maqnayd
Waan ku raadiyoo
Waan ku raagsadee
Iga raali noqo
Heedhe raasamaal
Raxan dumar haddii
Ta u roon xuliyo
Mid ka raac la dhaho
Kuma raynayee
Iga raali noqo
Raga waan nacaa
Ka ku raaca ee
Ku rafiiqiyoo
Ruuneey anaa
Isla kaa rabee
Iga raali noqo
Waxan raajacaa
Ra’yigeenniiyoo,
Riyadaan lahaa
Waan rumaynayaa
Wadnahaw rahmane
Iga raali noqo
Dareenkii I riday
Markii uu ribbaday
Raxmadaan hirqaday
Raas lagu negiyo
Reerbaan lahaa
U yagleel ruglee
Iga raali noqo
Rabitaanka iyo
Rasmi baa macaan
Kala raarmaayoo
Rar kolkaan is idhi
Ratigay gabee
Iga raali noqo
Roob igu da’aa
Qalbigii rarnaa
Radin waayayoo
Caqli soo rogmaa
Rusheeduu is yidhi
Wadnihii rujiyay
Rubucaad degtaye
Iga raali noqo
Rasaastii jacayl
Rukinkii hayiyo
Ruugbay heshee
Iga raali noqo
Runtii aan nacneen
Jar ka raaridniyo
Waa risaalad tani
Xabsi igu riddoo
Rumaan ii jartee
Iga raali noqo
Kuma ruufayoo
Rabbibaa qoree
Iga raali noqo
Rucubtaan cunniyo
Shalay raaxadii
Raxanraadka xigay
Waa rasiidh cishqiye
Iga raali noqo
Go’aankaan rogrogay
Kuma raacayoo
Ma raxlayanayee
Raaf-dilaacanaan
Ku qasbane rajooy
Iga raali noqo
Rayskii da’aba
Ramadkii kolkale
Rimi waayayoo
Gefka raaliyaay
Tunka waw ritee
Iga raali noqo
Rookaysniyoo
Koomo raagtaybaa
Ridiqdoo xiskii
Raq naflaan ehee
Iga raali noqo
Raandhiis qofloo
I rabbaysataay
Iga raali noqo
Ruqsad maan ka helin
Rubaddaan jantaye
Iga raali noqo
Kaama roorayee
Rafad baan ehee
Iga raali noqo